نصائح للمحافظة على وزنك في العيد

مع قدوم العيد تزيد الشهية لتناول الحلوى والعزومات وغيرها من الامور التى تسبب زيادة الوزن فى العيد ، ولتجنب الاحساس بتانيب الضمير بنقدّم لكم نصائح د. محمد ابو الغيط للمحافظة على الوزن خلال العيد .

نصائح للمحافظة على وزنك في العيد

– اولا بننصح الناس اللي بتعاني من اي مشكلات صحيه في الكبد او الكلي او غيرها، انهم ينتبهوا لانواع وكميات اللحمه اللي بياكلوها طول فتره العيد، علشان ما تاثرش علي صحتهم بعد كده.

– ناس كتير بتحب تفطر علي اللحمه والفته في العيد، وعلشان تتغلب علي الاحساس بالحرمان لو بتعمل ريجيم ممكن تعتبر اول يوم العيد هو اليوم الفري، وتفطر علي الاصناف اللي بتحبها، لكن طبعا دون اسراف في كميه الاكل، لكن ما يفضّلش انك تستمر علي كده طول ايام العيد.

– بننصح كل ست بيت انها تتخلص من قطع الدهون اللي بتكون موجوده علي اللحمه قدر الامكان، ولو بتختاري بين انواع اللحوم، فلازم تعرفي ان اللحمه البتلو تعتبر افضل انواع اللحوم الحمراء واخفها علي المعده، وبعدها تاتي اللحمه الكندوز، وبعدها اللحمه الضأني.

– لو بتحب اللحمه الضاني، فاعرف ان اقل قطع اللحمه الضاني ضررا هي القطع اللي بتكون موجوده في منطقه الكتف والفخذ.

– تناول الخضراوات الورقيه مفيد جدا مع اللحوم وخصوصا البقدونس، لانه بيساعد علي الهضم والتقليل من تاثير الدهون الضاره، علشان كده اهتم دايما بتناول البقدونس بجانب اطباق اللحوم.

– اهتم بتناول الميه قبل واثناء الاكل، وما تنساش اهميه ممارسه التمارين الرياضيه.

وفي النهاية بنتمنى إن كل قرائنا يلتزموا بالنصائح دي علشان يحافظوا على وزنهم وصحتهم طوال أيام العيد.